Acceso usuarios
Enrique Couceiro
As inscricións corporais veñen sendo obxectos de exame teórico por parte de diferentes enfoques antropolóxicos alternativos. Estas abordaxes salientan, segundo o caso, o seu carácter de prácticas do corpo implicadas nos procesos perceptivos e existenciais; os seus usos como estratexias de ideación, comunicación ou disputa da realidade sociocultural; a utilización simbólica do corpo como transunto da sociedade; o seu emprego como prácticas de biocontrol ou como recursos para a rebeldía; ou a vestimenta como demarcador de orixe e pertenza. Tras un repaso dos devanditos paradigmas, preséntanse catro estudos etnográficos sobre a tatuaxe ou a escarificación, ilustrando a especificidade e complexidade de formulacións e sentidos localmente asociados á arte corporal incisa. As conclusións propoñen a indelebilidade encarnada das inscricións corporais, e non o seu carácter «cruento », como trazo universalmente diacrítico e pretendido: aquel que constitúe a condición de posibilidade para calquera combinación específica dos restantes sentidos dados a tales prácticas.
